2008-02-20

Bost urte EGUNKARIA gabe


Otsoen hilean, otso maltzurraren atzaparren garratza geure gogo saminean, hitzak haizeak eraman ez ditzan.

2008-02-16

Besoen arteko epelean

Joana da ekaitza

heldua da egiak xuxurlatzeko unea

bihotzaren korapiloak deslotzeko unea

negu gorrien pisu itzela arintzeko unea

galdutako aukeren oinazeak ahazteko unea

malko katartikoak xurgatzeko unea

eta bidea argitzeko unea heldu da.


Eta ilun beltzenetik

sortzen den irribarreak

bide bihurria argituko du

iraganeko itzal gehiagorik ez

geure gogora hegan egiteko libre

Amodioaren txinpartak sentitu ditugu

eta Desira izeneko basoan barna goaz

elkarren eskutik

su mendien barna

amodioak damaigu argitasuna.


Hortaz, ez zaitez kezka

tximistak iluna urratzen duenean

besoetan hartuko zaitut

ortotsa noiz helduko zain

Elkarrekin eginen baitugu dantzan

azken mendeko azken urteko azken egunera arte.

Eta, baiki, udazken bati beste negu batek darraio,

baina nor da tximisten beldur besoen arteko epelean?


Post scriptum: badakit ez direla garai onak lirikarako... baina inoiz izan al dira garai onak lirikarako? Nafar Ateneoaren poesia aldizkarian argitaratu berri den poema txiki hau ekarri dut leiho honetara, giroa goxatzeko edo...

2008-02-14

2008-02-04

Pernando eraman dute


Pernando Barrena hartu dute atxilo gaur goizean Berriozarko udaletxearen ondo-ondoan. Beste Garzonkeria bat. Enegarrena. Berarekin batera atxilotu dituzte Patxi Urrutia, Amaiurren, eta Unai Fano, Larrabetzun. Pasa den larunbatean Iruñeko hotel batean emandako hitzaldia izan omen da euren krimen larria.
Berriozarko haren etxera eraman dute eta ordu bietatik laurak eta hamar arte luzatu dute antzerkia; antzerki dramatikoa: berdez, urdinez, eta kalez jantzitako aktoreek ez digute pasatzen utzi; kazetari guztiei utzi diete hurbiltzen Berria egunkariko kazetariari izan ezik; Pernandoren aitari ez diote utzi semea besarkatzen; Berriozarko alkateari berari ere ez diote pasatzen utzi. Hor egon garenok aukera izan dugu bost segundoz ikusi eta agurtzeko Citroën C 4 beltz batera zeramatelarik: "Aupa Pernando; Jo ta ke, irabazi arte. Animo, Pernando! Animo!"
Pernando eraman duten auto beltzean ardi beltzaren pegatina beltza itsasia; otso beltzak ardiaren pegatinaz mozorroturik. Inpotentziaren zapore mingotsa ahoan ari naiz idazten lerrook, egun batean, gaur etxetik eraman dituzten horiek gure oihu isila adituko duteneko esperantzarekin: "Aupa; jo ta ke, irabazi arte! Animo eta eutsi!"