2009-03-16

Gendulaingo iruzurrari ez

Internet-en bidez azken orduotan bolo-bolo dabilen ekimen batekin bat egin dut. Gendulain udal-barrutian eraikitzaileek mendeko negozioa egin nahi zuten ... Aitzitik, krisia dela zio, eraikitzaile peru-listo horiek ez dute espero zuten bezainbeste irabaziko... Eraikitzaileen onerako -eta beste guztion kalterako-, Nafarroako Gobernua prest agertu da eraikitzaileen zuloa gu guztion diruarekin estaltzeko... Balorea behar da, gero! Egia ez balitz, barregarria litzateke; baina egia da, tamalez, egia biribila. Corruptio optimi pessima est esaten zuten klasikoek, alegia, hoberenen -agintarien, kargodunen, politikarien- ustelkeria, txarren-txarrena. Hori ere egia biribila. Ingelesez ere esan genezake: Corruption of the best is worst, ea horrela ulertzen duten... baina, nago, ez dutela ulertu nahi izanen, esperantoz esanda ere.

Urrezko arau batek agintzen duen legera, jadanik Interneten dagoena ez da errepikatu behar; hortaz eta beraz, ez noa Gendulaingo iruzurraren aurkako agiria hemen berriro jartzera. Baina bai animatu nahi zaituztedala sinatzera, nik egin dudan gisara. Txiza egiten digute gainera eta euria dela sinistarazi nahi digute.


2 comments:

Anonymous said...

Orozen txistea, debrien txistea.

zaindari said...

Eraikitzaileen onerako -eta beste guztion kalterako-, Nafarroako Gobernua prest agertu da eraikitzaileen zuloa gu guztion diruarekin estaltzeko...
Hala da, Intxaurdi. Baina badira Gendulainen erabilitakoa baino bide ezkutukoagoak eraikitzaileen patrikak betetzen jarraitzeko. Progresoaren izenean jotako pelotazoak, adibidez.
Urdiain-Altsasun ere, bada horrelakorik. Ikus, "Urdiain ez saldu"
(http://www.aldorinternet.net/Urdiain/)